Рецепти: 7 посни предлози за ручек, за 7 дена во неделата
Велигденскиот пост е во тек, а ние ви донесуваме мени со највкусните посни јадења, за седум дена во неделата, почитувајќи ги правилата на постот.
Велигденскиот пост започна на 27 февруари и ќе трае до 15 април и е најдолг во православието.
Домаќинките често остануваат без инспирација и рецепти, па затоа ви пренесуваме посно мени за следните седум дена.
1. Крем чорба од домати
Состојки:
– 500 милилитри сос од домати
– 300 милилитри вода
– 2 моркови
– 1 главица кромид
– 2 компири
– сол и црн пипер
– малку магдонос
Подготовка:
Кромидот, морковот и компирот сварете ги во малку вода, а потоа сè измелете со миксер и додајте го сосот домати. Оставете сè да врие 15 минути, посолете и побиберете и додајте сув магдонос. Топлата чорба послужете ја со коцки сув леб.
2. Тавче-гравче
Состојки:
– 500 грама бел грав
– 250 грама кромид
– 2 суви пиперки
– малку масло
– црвена мелена пиперка
– сол и црн пипер
– ловоров лист или сушено нане
Подготовка:
Ставете го гравот во тенџере и налејте вода да го покрие гравот. Оставете да отстои. Исцедете го, и ставете го во тенџере со чиста вода, да се вари на умерена температура. Откако ќе зоврие, истурете ја таа вода, а во тенџерето со гравот сипете друга вода и додадете ја главицата кромид и сувите пиперка. Кога ќе се свари гравот, запржете го гравот така што во тава ќе направите „лута запршка“ со масло, брашно (не мора) и алева пиперка. Пропржете го гравот и оставете да се вари уште неколку минути. Потоа, додадете го ловоровиот лист и сè префрлете во земјен сад. Гравот печете го во претходно загреана рерна на 250 степени, околу 20-тина минути, додека да се формира тенка кора на површината.
3. Пастрмка со ореви
Состојки:
– 1 килограм пастрмка
– 150 грама ореви
– 1 главица кромид
– 1 лажица мелен црвен пипер
– масло
– сол и црн пипер
Подготовка:
Кромидот ситно исечкајте го и пропржете го во тава на загреано масло. Издробете ги оревите во аван или ситно исечкајте ги. Кога кромидот ќе омекне, во тавата додајте ги оревите, па мелената пиперка и измешајте. Кога ќе се испржи кромидот, тргнете ја тавата од шпоретот. Огноотпорниот сад премачкајте го со масло, внатрешноста на пастрмката наполнете ја со филот од тавата и наредете ја рибата во огноотпорниот сад. Преостанатиот фил нанесете го врз пастрмката и попрскајте со масло.
4. Турска посна мусака
Состојки:
– 1 килограм тиквички
– 500 грама модар патлиџан
– 1 кромид
– 2 пиперки
– 2 компири
– 500 милилитри доматно пире
– сол и бибер по вкус
– малку маслиново масло
– мирудија
– китка магдонос
Подготовка:
Излупете ги тиквичките и исечете ги на парчиња. Потоа, динстајте го секое парче неколку минути во маслиново масло. Во друг сад динстајте ги ситно сечканиот кромид, патлиџанот, пиперките и компирите. Додајте ги зачините и тргнете од ринглата. Во сад за печење наредете ред тиквички и одозгора намачкајте го филот со модар патлиџан. Постапката повторете ја додека не се потроши материјалот и завршете ја мусаката со ред тиквички. Одозгора сипете го доматното пире и ставете во загреана рерна. Кога течноста ќе зоврие, јадењето е готов. Вака подготвената мусака се служи посипана со сечкан мирудија и магдонос, а по желба може да се додаде и рендан посен кашкавал.
5. Јадење со печурки буковка и компири
Состојки:
– 300 грама буковка
– 4 компири
– 4 моркови
– 3-4 свежи пиперки,
– свежо мелен домат (или доматно пире)
– сол
– зачини по желба
Подготовка:
Компирите исечкајте ги на кришки, морковите на кругови, свежите пиперки на кругови, печурките буковка на парчиња. Наредете ги во огноотпорен или земјен сад. Посолете, додајте го сувиот зачин и другите зачини по вкус. Свежо мелените домати (или доматно пире) измешајте ги со вода и прелијте врз зеленчукот за да се натопи во сосот. Печете во рерна додека не испари водата.
6. Посни плескавици од компири
Состојки:
– 2 поголеми компири
– 1 китка млад кромид
– малку лук
– 2 лажички ајвар
– малку сол или зачин
– 200 милилитри вода
– 1 лажица брашно
– 50 грама презла
– масло
Подготовка:
Компирите излупете ги и сварете ги, па потоа изгмечете ги. Додадете сечкан млад кромид, малку лук, ајвар, сол или сув зачин.
Смесата добро изедначете ја и направете помали плескавици.
Во сад ставете 200 мл вода и додадете 1 лажица брашно. Поминете ги плескавиците низ приготвената маса, па „извалкајте“ ги во презла и пржете ги на масло додека не поруменат од двете страни. Извадете ги на салфетки за да го впие вишокот маснотии… Уживајте!
7. Туна со тестенини и пченка
Состојки:
– 200 грама (интегрални) тестенини
– 1 конзерва туна на парчиња
– 150 грама слатка пченка
– 2 млади кромитчиња
– 100-150 грама (посен) мајонез
– 1 лажичка сол
– 1/2 лажичка бибер
Подготовка:
Сварете ги тестенините со малку сол ал денте. Слатката пченка варете ја во солена вода 5-8 минути. Младиот кромид исечкајте го на помали парчиња. Во сад ставете ги изладените тестенини и слатката пченка. Благо промешајте. Потоа, додадете ги младиот кромид и туната. Сите состојки лесно измешајте ги за да се соединат. Посолете и побиберет по вкус. На крајот додадете мајонез и убаво соединете. Оставете во фрижидер добро да се излади.