„Последното ремек-дело“ на Густав Климт се очекува да биде продадено за 65 милиони фунти
Последниот портрет направен од Густав Климт се очекува да достигне цена од околу 65 милиони фунти на аукција во Лондон, која ќе се одржи подоцна овој месец. Ова е највисоката проценка досега дадена за уметничко дело на европска аукција, пишува „Си-ен-ен“.
Прикажувајќи неидентификувана жена, „Dame mit Fächer“ („Дама со ладало“) е една од двете слики пронајдени во студиото на австрискиот уметник по неговата смрт во 1918 година, велат од аукциската куќа „Сотби“.
Најавувајќи ја аукцијата, „Сотби“ го нарече портретот „последното ремек-дело“ на Климт.
„Убавината и сензуалноста на портретот лежат во деталите. Дамките од сина и розова боја, која ја оживуваат кожата на дамата, пердувестите линии на нејзините трепки и набиените усни кои му даваат карактер на нејзиното лице“, рече Томас Бојд Бауман од „Сотби“.
Започнато во 1917 година, делото е изведено во карактеристично богатиот експресивен стил на Климт. Како и во поголемиот дел од неговата работа, и во ова дело се чувствува влијанието на источна Азија врз Климт – не само поради ладалото во рацете на жената, туку и поради мотивите со митолошката птица феникс и цветовите со лотос.
„Dame mit Fächer“ („Дама со ладало“) е едно од ретките дела на Климт кое сè уште е во приватна сопственост. Невообичаено, тоа е во форма на квадрат, со големина од приближно еден метар во висина и ширина. За разлика од најпознатите портрети на уметникот, ова дело не било нарачка, што значи дека, најверојатно, било насликано за негово задоволство.
Сликата претходно била во сопственост на виенскиот индустријалец Ервин Боле, пријател и покровител на Климт. Подоцна била купена од колекционерот на уметнички дела Рудолф Леополд, кој го продал на семејството на сегашниот сопственик во 1994 година, за помалку од 12 милиони долари. Оттогаш сликата не се појави на аукција, иако минатата година беше изложена во виенскиот музеј „Белведере“, каде се изложени неколку дела на Климт, меѓу кои и најпознатата „Der Kuss“ („Бакнежот“).
„Dame mit Fächer“ („Дама со ладало“) ќе биде претставена на летната аукција за современи уметнички дела на аукциската куќа „Сотби“, која ќе се одржи на 27 јуни во Лондон, Велика Британија.