За влез во Дино парк во иднина нема да се плаќа посебна влезница од 50 денари, туку со купен билет за Зоолошка градина ќе може да се посети и делот со диносауруси, кој од неговото отварање до сега е вистинска атракција за најмладите. За таа цел ќе се зголеми и цената за влез во Градината, па наместо 80 денари како досега, ќе се плаќа 100 денари.

Измени ќе има и во останатите цени, па така наместо 20 денари за посета на Бејби ЗОО, според предложената одлука што денеска ќе се најде на седница на Советот на Град Скопје, влезницата ќе чини 30 денари, а се зголемува и цената на билетот за организирани групни посети за децата од градинките од 40 на 50 денари. Поскапо ќе биде и возењето на ЗОО возот, каде наместо 50 ќе се плаќа 60 денари, освен за дечињата на возраст до една година, за кои ќе биде бесплатно.

Се утврдува и предлага и нова услуга – групна посета од минимум 20 посетители, кои можат да ја посетат Зоолошката градина и Дино паркот по цена за билет од 70 денари по лице – се прецизира во предгогот.

Одлуката, која е донесена од Управниот одбор на Зоолошка градина и за која треба да се изјаснат советниците, како што се вели во образложението, е поради економската и енергетската криза која се одрази на цените на храната за животните и на останатите производи и комунални давачки.