Сите кошаркарски натпревари во младинска и сениорска конкуренција што беа планирани во периодот од 14 до 19 октомври (од вторник до недела) се одложуваат, поради претстојните локални избори што ќе се одржат во земјава.

Министерството за внатрешни работи (МВР) испрати официјално известување до клубовите, во кое се наведува дека полициските сили ќе бидат целосно ангажирани околу безбедносниот аспект на изборниот процес, што го прави невозможно нормалното одвивање на спортските настани во овој период.

Поради тоа, сите закажани натпревари во наведениот период ќе бидат презакажани, а од Кошаркарската федерација на Македонија веќе е одреден нов термин за нивно одигрување и тоа е  од 20 до 22 октомври.

„Сите одложени натпревари задолжително да се одиграат во периодот: понеделник 20.10.2025 до среда 22.10.2025 година. Доколку двата клуба се усогласат, натпревар може да биде одигран и ПО овие датуми, но ИСКЛУЧИВО СО ПИСМЕНА СОГЛАСНОСТ од клубовите и НАЈДОЦНА ДО ПОЧЕТОКОТ НА СЛЕДНОТО КОЛО (25–26.10.2025 – сабота/недела)“, стои во соопштението.

Преземено од: Спорт.ком.мк