Бразилската поп-ѕвезда Дани Ли, родена како Даниеле Фонсека Мачадо, почина на 42-годишна возраст по компликации од операцијата на липосукција во Пињас, Бразил, пишува „Сан“ (The Sun). Шокираните обожаватели се збогуваа со пејачката на социјалните мрежи.

Позната во Бразил по нејзиниот хит „Eu sou da Amazonia“, Дани Ли во петокот била подложена на процедура која вклучувала липосукција на стомакот и грбот, како и намалување на градите. Пејачката итно била пренесена во болница во Куритиба, но и покрај напорите на лекарите, таа им подлегнала на компликациите и починала.

Веста ја потврди нејзиниот сопруг Марсело Мира, кој додаде дека биле многу потресени. Пејачката зад себе ги остави сопругот и седумгодишната ќерка. Точната причина за компликациите не е позната, а „Сан“ пишува дека таа потрошила 4.000 фунти за операцијата.