Попладнево на јавната расправа за ДУП-от за Трнодол, што се одржува во општинска зграда во Карпош, настана тепачка.

Среде презентацијата на ДУП-от, кој го спорат жителите на Трнодол се случи немил настан, новинарските екипи останаа надвор, а на местото пристигна и полициска екипа.

Дел од присутните  изразија незадоволство што Општина Карпош го форсира донесувањето на овој ДУП со кој се предвидува зголемување на урбанизацијата, изградба на три шесткатници кај каналот за спречувањее на поплави во Трнодол и изградба на индивидуални објекти високо на Водно.

Градоначалникот на Општина Карпош, Стефан Богоев на вчерашната прес-конференција информираше дека нема да се гради нова населба над Трнодол и дека соседната населба Жданец, воопшто не е опфатена со Деталниот урбанистички план (ДУП).

Претходно во соопштение, жители од населбата Трнодол најавија се подготвуваат за протести и неколку тужби кон Општината, градоначалникот, а можеби и кон општинските и градски советници.

Жители од населбата Трнодол бараат забрана и за какво било градење во парк шумата Водно – над нивните населби, враќање, односно поништување на контраверзниот регулациски план, прифаќање на нивните барања, па дури потоа да се отвара иницијатива за нов предлог ДУП.