Полицијата истражува: Кој ја украде цветната урна од гробот на Вивиен Вествуд?
Полицијата ја истражува кражбата на цветната урна од гробот на Вивиен Вествуд, неодамна починатата славна модна дизајнерка, пишува „Би-би-си“.
Легендарната креаторка почина во декември минатата година. Таа беше погребана во родното село, каде цвеќарката Ања Норис била задолжена да се грижи за гробот на барање на семејството на Вествуд.
Цвеќарката Норис, која води бизнис во блискиот град Глосоп била избрана да ги дизајнира и направи цветните додатоци на гробот. А, кога дознала за кражбата на цветната урна, била шокирана што некој успеал да ја земе, бидејќи се работи за многу тешка урна.
„Тоа е големо непочитување, се надевам дека ќе ја вратат“, изјавила Норис за „Би-Би-Си“.
Полицијата во Дербишир соопштила дека, полицајците биле повикани на пријава за кражба на 28 мај во Чапел Броу, веднаш по 18:20 часот. Тие апелираат да бидат контактирани од секој што забележал некакви сомнителни дејствија во оваа област помеѓу 21 мај и 28 мај.
Инаку, Вивиен Вествуд е родена во селото во 1941 година, а во 1958 година се преселила во Лондон. Таа е една од најпрепознатливите британски модни дизајнерки и голем еколошки активист, која водеше кампањи за прашања како што се, експлоатацијата на нафта, климатските промени, нуклеарното оружје и лошото влијание на т.н. брза мода.
На меморијалната церемонија во катедралата Саутворк во Лондон, во февруари, присуствуваа многу познати личности, а многумина од нив ги поклонија нејзините дела во знак на почит.