Ирскиот актер Пол Мескал (28), една од најголемите актерски ѕвезди на помладата генерација, изјави дека во иднина планира повнимателно да ги избира проектите за да не „престане да ја сака својата работа“.

Мескал се прослави со улогата на Конел Валдрон во минисеријата „Нормални луѓе“ (Normal People), снимена според истоимениот роман на ирската писателка Сали Руни. Серијата беше еден од најголемите телевизиски хитови за време на пандемијата и стана глобален феномен.

Оттогаш, атрактивниот Ирец оствари улоги во големи филмски проекти, меѓу кои спектаклот „Гладијатор II“ (Gladiator II), како и драмите „Хамнет“ (Hamnet) и „Историја на звукот“ (The History of Sound), кои наскоро ќе пристигнат во кината.

Тој, исто така, ќе го отелотвори Пол Макартни во амбициозниот проект од четири биографски филма за „Битлси“, во режија на Сем Мендес.

„Пет или шест години сум во ова и се чувствувам навистина среќно. Но, во исто време сфаќам дека не можам постојано да работам со вакво темпо“, изјави Мескал во разговор за „Гардијан“.

На прашањето дали тоа значи дека намерно забавува, тој одговори: „Да, мислам дека значи. Без сомнение ќе морам да почнам со тоа. Но, тоа не мора да значи дека ќе работам помалку. Се работи за да се разбере дека некои филмови, како ‘Историја на звукот’ (The History of Sound), емоционално и креативно многу повеќе исцрпуваат од други. Не можеш постојано да се враќаш на истиот извор и да очекуваш секогаш да дадеш нешто со кое навистина ќе се гордееш“.

Во тој филм Мескал го игра Лионел, а дејството го следи неговиот однос со Дејвид (го игра Џош О’Конор). Двајцата се запознаваат во 1917 година на Конзерваториумот Нова Англија, а по Првата светска војна заедно патуваат низ руралните делови на американската сојузна држава Мејн, каде во зимата 1920 година снимаат народни песни.

„Како точно ќе изгледа тоа забавување, сè уште не знам“, рече актерот, додавајќи дека многу му недостига театарот.

„Можно е извесно време да работам исклучиво на сцена. Покрај тоа, во приватниот живот имам неколку приоритети на кои сакам повеќе да им се посветам. Не сакам да дојдам во ситуација да си замерам себеси поради работата што ја сакам. Можеби звучи радикално, но ако изборот е таков, попрво би се симнал од тој воз“, истакна тој.

Мескал моментално го промовира филмот „Хамнет“ (Hamnet) на режисерката Клоја Жао, кој говори за Вилијам Шекспир и неговата сопруга Агнес (ја игра Џеси Бакли), како и за нивната борба со тагата по смртта на синот.

Говорејќи за идните планови, тој додаде: „Откако ќе заврши промоцијата на тој филм, мислам дека луѓето извесно време нема да ме гледаат, барем до 2028 година, кога ќе работам на проектот за ‘Битлси’. Публиката малку ќе одмори од мене, а и јас од неа“.

Мескал ќе дебитира и на сцената на Ирскиот национален театар во 2027 година, каде ќе настапи во претставите „Свирче во темнината“ (A Whistle in the Dark) и „Смртта на трговски патник“ (Death of a Salesman).

Последен пат беше на театарските штици во 2023 година, кога ја освои престижната награда „Оливие“ за улогата во претставата „Трамвај по име желба“ (A Streetcar Named Desire), а потоа заигра и во „Гладијатор II“ (Gladiator II).

„Уживав во снимањето на ‘Гладијатор’, но ‘Историја на звукот’ за мене беше како враќање дома. Тоа е простор во кој се чувствувам најсигурно. Би сакал да снимам повеќе такви филмови, а помалку големи проекти како ‘Гладијатор’“, вели тој.

ФОТО | Пол Мескал версус Педро Паскал: Објавени првите фотографии од сетот на „Гладијатор 2“