Поголем дел од зонските паркинзи на ЈП „Градски паркинг“ и ЈП „ПОЦ“ утре, по повод празникот 1 Мај, Меѓународен ден на трудот, ќе бидат бесплатни за граѓаните, информираа од претпријатијата.

Од ЈП „Градски паркинг“ додадоа дека освен зонските, нема да се наплаќа паркирањето и на паркинзите „Зоил“ и „8 Септември“.

Сепак, за 1 Мај редовна наплата ќе има на паркингот на Водно, паркиралиштата „Кочо Рацин“, „Народен фронт“, „Нова Македонија“, „АМСМ“, „Треска“, потоа на катните гаражи „Беко“ и „26 Јули“, како и на паркинзите кај Градска болница и кај клиничкиот центар „Мајка Тереза“.

Исклучок од бесплатното паркирање во Центар, пак, се затворените паркиралишта со автоматска наплата „Дилајла“, „Трготекстил“ и „Палома Бјанка“ каде што наплатата ќе се одвива согласно редовниот режим, информираа од ЈП „ПОЦ“.

Оттаму додадоа дека веќе од сабота, редовната наплата за паркирање на паркиралиштата ќе продолжи со вообичаено работно време.