По успешната концертна промоција на новиот албум, која се случи во петокот во МКЦ, групата Баклава го презентира новото музичко видео за песната „Тиркиз“.

Видеото е изработено од продукцијата на „091“, а режијата е на Јана Мишо. Шминката ја направи Ирена Сенокозлиоска. Музиката е на Елена Христова, вокалистка на „Баклава“, а текстот на Сибо.

– Тиркизната боја го доби своето видео. Инспирана од играта на зборови на името на драгиот камен што воедно е и симбол на турската естетика, се доловуваат убавините од Истанбул до прекрасното крајбрежје на југот. Стиховите се претежно на македонски јазик, но има и по некоја строфа и на турски…Описно овој колоритен албум е создаван на концептот на бои. Секоја песна е посветена на конкретна боја, претставена преку музиката и стиховите. Сликата што ќе ја добиете слушајќи ги, е токму она расположение што ви ја предзвикува некоја од 13те бои од албумот, велат од „Баклава“.

Следуваат настапи за промоција на новиот звук на „Баклава“, а од поважните настапи е учеството на овогодинешниот Оффест, во јуни.