Поглед кон танц-претставата УПМ во МКЦ
Минатата недела во Денсинг-салата на МКЦ премиерно се одигра новата претстава УПМ (Уметност – Политика – Мудрост) на танцовото здружение „Икс на квадрат“. Кореографијата и режијата се на Бобан Русески и Јована Зајкова. Атмосферата беше исполнета со силна енергија, а младите уметници ја претставија кафеаната реално, со сите убави и помалку убави моменти.
– Се фокусиравме на традиционалната македонска музика и на кафеаната како нешто карактеристично за нашиот народ, претставена преку традиционалната игра, но и моделирана низ палетата на современиот танц – истакна Зајкова, додавајќи дека целта не е да се исмее ни кафеаната ни луѓето што одат во кафеана: „Едноставно е претставена сирово, онака каква што ние ја гледаме, со сите убавини и неубавини, смешни, тажни, радосни моменти. Музиката даде една сосема нова димензија, потенцирајќи го фактот дека традиционалната музика не припаѓа само во кафеаната, како заднинска музика, туку и на сцената каде што навистина ќе успее да дојде до израз“.
Зајкова дипломира при Универзитетот „Гоце Делчев“ во Штип, на катедрата за современ танц. Настапува на реномирани фестивали во Македонија и во странство. Вели дека во сите претстави каде што е танчар, но и кореограф, идејата ја добива од тоа што го гледа околу себе.
– Мислам дека тоа ни е една многу важна заедничка точка со Боби, бидејќи иако имаме различен принцип на работа, а понекогаш и различни идеи, појдовната точка е иста, па на крајот успеваме да најдеме заедничко решение – вели Зајкова.
Русески појасни дека претставата е надградба на „Самовили и демони“, што премиерно била изведена минатата година во Загреб.
– Размислувавме како да се допре со традиција до младината и истовремено да се задржи тежината на спојот на современиот танц и традиционалната музика. На сите ни е познато како изгледа одењето во кафеана и јас би го опишал многу едноставно: започнува со темата уметност, по втората – третата чашка почнуваме да ја бистриме политиката, а по четвртата – петтата чаша настапува мудроста – објаснува Русески, и додава: „Соработката беше едноставна, јас и Јована веќе осум години сме колеги, соработници, другари и некогаш истомисленици, како што е доказ и ова кореографско делo. Во 2021 решивме да го формираме ’Икс на квадрат‘ и оттаму произлегоа неколку заеднички и индивидуални кореографски претстави“.
Музиката е на Дејан Теодосиевски, а ја изведе квартетот „Вива стрингс“ (Елена Талевска – прва виолина, Димитар Михајловски – втора виолина, Дубравка Зајкова – виола, Дејан Теодосиевски – виолончело). Вокалот и перкусиите се на Зарина Првасевда. Русески и Зајкова претставата ја изведоа заедно со Сара Цветковска, Клара Христовска, Микаела Анџела Глигорова, Викторија Коцева, Илина Костовска, Моника Шолевска, Наум Ѓоргиески и Марко Младеновиќ. Костимите ги изработи Соња Геговска-Зајкова, а видеото е на Доан Акити.
– За оваа претстава ни беше предизвик да работиме со голема екипа од 15 изведувачи во која не сите се дел од танцовиот свет – истакна Русески.
– Сите учесници се од различни страни, на различна возраст, дел се танчари, дел актери, дел музичари, но ентузијазмот, креативноста и љубовта кон уметноста нѐ спои сосема лесно и го направи процесот на работа една прекрасна авантура, што се надевам дека нема тука да запре – заклучи Зајкова.
(Текстот е објавен во „Културен печат“ број 134, во печатеното издание на весникот „Слободен печат“ на 25-26 јуни 2022)