Шон Свејзи, помладиот брат на легендарниот американски актер Патрик Свејзи, почина на 63 години. Информацијата ја потврди неговиот син Џеси.

Во изјава за „ТМЗ“, Џеси наведе дека Шон Свејзи починал на 15 декември. Канцеларијата на медицинскиот истражител на округот Лос Анџелес утврди дека причината за смртта била акутно крварење од горниот гастроинтестинален тракт и цироза на црниот дроб.

Неговата роднина Рејчел Леон се огласи на социјалните мрежи по тажната вест. Таа меѓу другото наведе дека планирала да го посети во Тексас.

„Нашите мисли и молитви се со неговиот брат Дон Свејзи и со неговите деца Кеси Свејзи, Кајл Свејзи и Џеси Свејзи. Се молиме за целото семејство во овој тежок момент. Знајте дека ве сакаме и дека секогаш сме тука за вас“, порача таа.

Шон Свејзи почина 16 години по смртта на неговиот славен постар брат, кој почина од рак на панкреасот на 57 години. Патрик Свејзи, кој во јануари 2008 година доби дијагноза рак на панкреас во четврта фаза, јавно зборуваше за својата борба со смртоносната болест во разговор со Барбара Валтерс непосредно пред смртта.

„Би рекол дека пет години е прилично празна желба. Две години изгледаат возможни ако се водите според статистиката. Сакам да издржам додека не најдат лек“, изјави тој почетокот на 2009 година.