Гери Греам, познат по улогата во серијата „Ѕвездени патеки“ („Star Trek“), ненадејно почина на 73-годишна возраст. Телевизискиот актер починал вчера (22 јануари), соопшти неговата поранешна сопруга Сузан Лавел.

„Со длабока и голема тага морам да кажам дека Гери Греам, мојот поранешен сопруг, извонреден актер и татко на нашата прекрасна единствена ќерка Хејли Греам, почина денеска“, напиша вчера Лавел на својот фејсбук-профил.

Во серијата „Ѕвездени патеки“, Греам го играше амбасадорот Совал.

Кариерата на Греам траеше пет децении, почнувајќи од седумдесеттите во телевизијата и филмот, најистакнато како детективот Метју Сајкс во „Вонземска нација“ („Alien Nation“).