По сторијата на „Слободен печат“ во која обзнанивме дека во Виница, лица без никакво медицинско искуство, сосема нелегално правеле „тестови“ за коронавирусот преку прозорец, и тоа на начин што пациентите суспектни за Ковид 19 самите си ги земале брисовите, и самите си земале крв по што резултатот го добивале на лента со една или две цртки, слично на тест за бременост, полицијата пронашла две осомничени лица, сторители на овие незаконски активности.

Како што објавивме вчера, пациенти од Виница, се јавувале кај матичните лекари за да им кажат дека се „негативни“ на коронавирусот, откако дома им дошол некој да ги тестира со тест „кој покажувал една или две цртки“и „се правел со една капка крв“.

Според нашите извори кои се матични лекари во Виница, ваквото тестирање, кое е сосема незаконско, медицински неиздржано, нерелевантно, опасно и претставува општа закана за јавното здравје, го извршувале лица со сопствено возило и за него наплаќале 1000 денари.

Поради постоење на основи на сомневање за сторено кривично дело ,,незаконско земање и користење на генетски и биолошки материјал”, казниво по член 210 од Кривичниот законик, со наредба од Јавен обвинител, бил извршен претрес во дом и други простории кои ги користат горенаведените лица и правното лице, по што во домот на В.П пронајдени се седум кеси со натпис „Ковид чек ТМ“ и едно шише од два милилитри со течност со натпис буфер кои се одземени. 

До надлежното обвнителство ќе биде доставен соодветен поднесок а во наредниот период исто така полицијата ќе работи на вакви и слични случаи.

МВР апелира граѓаните да им веруваат и да им се обраќаат само на овластени медицински лица кои се матични лекари или епидемиолози на институтот или на центарот за јавно здравје и да не наседнуваат на вакви измами, а МВР во координација со другите институции ќе ги санкционираат ваквите појави.