По една деценија од несреќата пронајдени човечки останки во рудник во Нов Зеланд
Полицијата на Нов Зеланд пронашла човечки останки во рудник во кој пред 11 години се случила трагична несреќа.
„Човечки останки се пронајдени во рудник за јаглен во Нов Зеланд“, соопшти денеска полицијата, повеќе од една деценија по една од најтешките катастрофи во земјата.
Во ноември 2010 година, по серија експлозии предизвикани од гас метан во рудникот на реката Пајк, загинаа 29 лица. Двајца рудари успеале да побегнат, пишува британски Скај.
Во рудникот биле пронајдени две-три тела
Рудникот потоа бил затворен и влезот бил забранет со години од безбедносни причини. Но, на барање на семејствата на жртвите во несреќата, на истражителите им беше дозволен пристап во 2019 година.
Полицијата соопшти дека фотографиите направени во рудникот кон крајот на минатата недела покажуваат дека таму биле пронајдени две, можеби три тела. Со оглед на тоа што остатоците се далеку од влезот во рудникот, истражителите засега не можат да направат подетална анализа.
„Иако не успеавме да ги идентификуваме останките, работиме со форензичарите за да видиме како можеме да го утврдиме нивниот идентитет“, рече детективот Питер Рид.
Инспекторите соопштија дека шест до осум лица работеле во областа каде што биле пронајдени останките во моментот на несреќата.