Богородичната црква во Париз, која беше тешко оштетена во пожарот во 2019 година, по три децении повторно беше домаќин на свадбена церемонија – и тоа за човек кој директно учествуваше во нејзината обнова, пишува „Пипл“.

Во саботата, на 25 октомври, дрводелецот Мартен Лоренц, кој три години работел на реконструкцијата на катедралата, се ожени со својата избраничка Жад, пренесуваат извори од француските медиуми.

Бидејќи Богородичната црква не е парохиска црква и не одржува приватни церемонии, за свадба е потребна посебна дозвола од надбискупот на Париз. Таква дозвола била одобрена од надбискупот Лорен Улирик, во знак на признание за трудот и пожртвуваноста на Лоренц при обновата на катедралата.

Последна свадба во Богородичната црква се одржала во 1995 година.

На церемонијата присуствувале околу 500 гости – пријатели, роднини и колеги. Многумина од нив пристигнале со симболични дрводелски алатки за да му оддадат почит на занаетот и на човекот кој помогна да се подигне катедралата повторно.

Катедралата била осветлена со блескави светла, свеќи и статуи кои ја засилиле свечената атмосфера.

Оливје Рибадо Дима, архипротонот на Богородичната црква, им се обратил со зборовите: „Жад и Мартен, добредојдовте во оваа катедрала. Мартен, ти ја познаваш добро — ја познаваш и одозгора“.

Видно возбуден, Лоренц изјавил: „Сакам да ја споделам мојата љубов, нашата љубов, со целиот свет, со сите на кои им е потребна. Ова е најубавиот ден во мојот живот“.