По 1.000 евра грант за дваесет компании од АЕТМ и Виза за отворање на Е-продавница
Асоцијацијата за е-трговија на Македонија – AETM, втора година по ред, објави Jавен повик за бесплатно отворање на е-продавници насловен „Е-трговија: Супермоќ за локалните бизниси“ вол.2, кој се реализира во партнерство со компанијата Виза.
Јавниот повик е отворен за сите микро, мали и средни компании, кои сè уште не ги продаваат своите производи или услуги онлајн, со цел да добијат можност да отворат дополнителен продажен канал – е-продавница во рамките на локален маркетплејс или своја е-продавница со сопствено софтверско решение, да го зголемат своето онлајн присуство, да се во тек со последните трендови во е-трговијата и да ги зајакнат дигиталните вештини поврзани со е-трговија и дигитален маркетинг.
Јавниот повик се состои од поддршка на 20 компании со вредносни пакети од 1.000 евра за отворање нов продажен канал – е-продавница и учество на еднодневен едукативен практичен семинар.
Поддржаните компании ќе имаат можност да одберат да отворат нов продажен канал – е-продавница како дел од една од понудените маркетплејс платформи на Јавниот повик и да добијат маркетинг промоција со цел зголемување на е-продажбите или да отворат своја е-продавница со сопствено софтверско решение преку една од понудените ИТ-компании на Јавниот повик.
Отворањето на е-продавниците ќе се одвива во мај и јуни 2024 година. Еднодневниот практичен семинар „Сѐ за е-трговија“ ќе се одржи во јуни 2024.