Возачот на Мекларен, Оскар Пјастри пристигнува на домашната трка со доза на оптимизам, но и претпазливост. Пред првите слободни тренинзи на отворањето на сезоната во Формула 1 шампионатот, Австралиецот верува дека распределбата на моќноста е сè уште многу неизвесна поради целосно новите технички прописи.

Иако Мекларен ги освои последните две титули кај конструкторите, Пјастри предупредува дека ова можеби нема да значи ништо во новата ера на шампионатот.

– Мора да почекаме и да видиме. Правилата се сосема различни. Би било многу оптимистички да се каже дека ќе бидеме во истата форма како пред 12 месеци. Мислам дека сме некаде близу до врвот, но врз основа на тестирањето се чини дека Мерцедес и Ферари имаат мала предност пред нас и Ред Бул“, рече Пјастри, како што објави motorsport.nextgen-auto.com.

Според него, ситуацијата би можела брзо да се промени бидејќи тимовите ќе донесат нови подобрувања на своите болиди.

– Нештата се менуваат многу брзо бидејќи сите учат и внесуваат новитети во болидот, па ќе мора да почекаме на првите трки за да добиеме појасна слика – додаде Австралиецот.

Од своето деби во Формула 1, Пјастри постигна значителен напредок од сезона во сезона. Сепак, промената во техничките прописи оваа година го отежнува проценувањето на вистинскиот баланс на моќ.

Првата трка од новата Ф1 сезона ќе се вози претстојниот викенд за Големата награда на Австралија (6-8 март 2026).