Загребската полиција поднесе кривична пријава против 49-годишен човек поради сомнеж дека извршил кривично дело од омраза, односно дека го оштетил Соборниот храм на Српската православна црква (СПЦ) во центарот на Загреб, објави „Бета“.

Утврдено е дека на 23 април, околу 2:00 часот по полноќ, осомничениот дошол до православната црква на Цветниот плоштад, каде што со алат скршил четири ѕидни светилки на влезните скали и витраж над влезната врата.

Во соопштението се наведува дека тој свиткал две камери за видео надзор, фрлил четири столчиња од терасите на блиските угостителски објекти, расфрлал цвеќиња и црево за наводнување пред влезната врата на црквата.

Потоа, полицијата го забележала околу 2:50 часот по полноќ во блиската улица „Илица“, додека носел канта за ѓубре со намера да ја испразни пред црквата. Притоа викал и користел говор на омраза, наведува загребската полиција.

Се додава дека во организмот имал 1,39 промили алкохол. Тој бил приведен, а потоа со кривична пријава е предаден во притвор.

Министерот за внатрешни работи, Давор Божиновиќ, претходно изјави дека во хрватското општество нема да се толерира такво однесување и дека полицијата со брза интервенција го идентификувала сторителот.

Србите како колатерална жртва на хрватската десница