Пензионерот Владислав Н., кој минатата година на предизборен митинг во Добра го нападна чешкиот премиер Андреј Бабиш, удирајќи го со стап, е осуден на условна казна затвор од една година, пренесе чешкиот „Деник“.

Судот во Фридек-Мистек, исто така, му наложи на обвинетиот да ги плати трошоците за лекувањето на политичарот.

Инцидентот се случил на 1 септември минатата година, кога Владислав Н., кој не бил меѓу симпатизерите на Бабиш, го удрил политичарот двапати додека тој одговарал на прашање.

Повредите на Бабиш не биле сериозни, а тој набргу продолжил со средбата со гласачите и го прифатил извинувањето од напаѓачот.

Во текот на судскиот процес, обвинетиот признал дека се кае и објаснил дека „атмосферата го понела“ и дека тоа била „емотивна реакција“.

Владислав Н. бил обвинет за нарушување на јавниот ред и мир и за обид за нанесување телесни повреди.

Судот, по одржаната главна расправа, одлучил да му изрече условна казна и обврска за надомест на трошоците за лекување.