Папата Франциск со порака до учесниците во Давос: Оставете го профитот настрана и носете етички одлуки
Папата Франциск ги повика учесниците на Светскиот економски форум во Давос од политичкиот, економскиот и деловниот свет да размислуваат надвор од профитот и да користат морални и етички одлуки за да се обидат да заздрават сè поделениот свет.
Во пораката до најмоќните светски лидери кои се состанаа во швајцарско одморалиште, Франциск повика на борба против „неправдите кои се основната причина за конфликтот“, првенствено гладот и експлоатацијата на природните ресурси во корист на малкумина.
„За жал, кога ќе погледнеме наоколу, гледаме сè пораспаднат свет во кој милиони луѓе – мажи, жени, татковци, мајки, деца, чии лица се главно непознати за нас, продолжуваат да страдаат, дури и како резултат на долгорочни конфликти и вистински војни“, напиша 86-годишниот папа.
Франциск, кој ја направи заштитата на сиромашните и имигрантите еден од најважните моменти на неговото 11-годишно папство, истакна дека глобализацијата во основа мора да има морална димензија во економските, културните и политичките дискусии што се одржуваат во Давос.
Државите и деловниот свет мора да се обединат во промовирање на етички модели на глобализација кои го ставаат општото добро над стремежот за моќ и индивидуален профит.
„Како е можно во денешниот свет луѓето да продолжат да умираат од глад, да бидат експлоатирани, осудени на неписменост, основна здравствена заштита да им е недостапна и да останат без засолниште?“, праша тој.
Аргентинскиот папа, првиот поглавар на Католичката црква од Глобалниот југ, рече дека ситуацијата во светот бара компаниите да не се водат само од профит, туку и со „високи етички стандарди“.
„Широката експлоатација“ на работниците со ниски плати и без перспектива за личен и професионален развој мора да престане, рече тој.
„Затоа, се надевам дека учесниците на овогодинешниот Форум ќе ја имаат предвид моралната одговорност што секој од нас ја има во борбата против сиромаштијата, стремејќи се кон интегрален развој на сите наши браќа и сестри и потрагата по мирен соживот меѓу нациите“.