Романската полиција отвори истрага откако наставничка им се заканувала на ученици со нож во средно училиште во местото Галац, пренесуваат локалните медиуми.

Таа, според изјавите на учениците, извадила нож од чантата и им рекла дека ќе им „ги отсече прстите ако не бидат добри“, пренесува Диги24.

На наставничката ѝ е забрането да држи настава, а полицијата покренала истрага.

Инцидентот се случил кон крајот на ноември во националниот колеџ „Когалничеану“ во Галац.

Наставничката што предавала информатичка технологија им се заканувала на учениците од 9. одделение со преклопен нож што го носела во чантата, а за да ја демонстрира острината на сечилото, пресекла парче хартија.

Некои ученици го сфатиле гестот како шега, додека други им кажале на родителите, кои ја известиле управата на училиштето и полицијата.

Наставничката им изјавила на истражителите дека носи нож во чантата за да може да исече овошје што го понела, пренесува Танјуг.