Екипата на Борусија Дортмунд пред почетокот на оваа сезона важеше за сериозен конкурент кој може да го предизвика Баерн Минхен за титулата во Бундеслигата, но прикажаните игра се далеку од очекувањата.

„Милионерите“ во досегашните 20. кола доживеаја дури осум порази, од кои три дојдоа во последните четири кола. Со таков учинок, Борусија се наоѓа на разочарувачкото шесто место на табелата со што уште сега ги загуби шансите за титулата, бидејќи лидерот Баерн им бега 16 бода.

И додека пандемијата на коронавирусот им донесе големи финансиски проблеми, доколку не успеат да се пласираат во Лигата на шампионите, „милионерите“ дополнително ќе ја влошат финансиската состојба и ќе бидат приморани да го направат најнепосакуваниот чекор – масовна продажба на фудбалерите.

Според германските медиуми, доколку не се пласира во Лигата на шампионите, Борусија Дортмунд ќе остане без осум фудбалери, а меѓу нив се најголемите ѕвезди и најбараните играчи на трансфер пазарот, Ерлинг Халанд и Џејдон Санчо. И двајцата фудбалери се на мета на најголемите екипи, Халанд е на радарот на речиси сите европски гиганти, додека Санчо најверојатно на лето ќе се врати во Премиер лигата каде најзагреан за него е Манчестер јунајтед.

Освен двоецот Халанд-Санчо, на лето може да си замине и младиот Џад Белингем кој минатото лето пристигна во Дортмунд од Бирмингем за 25 милиони фунти.

Останатите фудбалери кои се на излезни врати од „Сигнал Идуна парк“ се, Аксел Витсел, Мануел Аканџи, Рафаел Гереро, Џовани Рејна и Махмуд Дауд и за сите нив постои сериозен интерес.
Доколку ги продаде сите играчи, се очекува Борусија Дортмунд да заработи повеќе од 300 милиони евра со кои ќе успее да ја преброди финанската криза предизвикана од пандемијата на коронавирусот.