Претседателот на Фудбалската федерација на Македонија (ФФМ), Масар Омерагиќ, соопшти дека денеска се одржал конструктивен состанок на Комисијата за избор на нов селектор на македонската А репрезентација, по разделбата со досегашниот селектор Благоја Милевски.

„Како Комисија за избор на нов селектор на македонската А репрезентација, денеска имавме конструктивен состанок. Споделивме размислувања за профилот на македонски тренер кој ќе внесе стабилност, јасна идеја и континуитет во најдобрата селекција. Предлогот ќе биде доставен до Управниот одбор на ФФМ најдоцна до 25 декември“, напиша Омерагиќ на социјалните мрежи.

Комисијата ја сочинуваат фудбалските легенди Горан Пандев, Агим Ибраими и Николче Новески, кои заедно ќе го предложат најсоодветното решение.

Како најсериозни кандидати за кормилото на националниот тим се споменуваат Гоце Седлоски и Игор Ангеловски. Новиот селектор се очекува да биде познат пред крајот на годинава.

Преземено од: Sport.com.mk