Адвокатот на Љупчо Палевски, Јовица Страшевски, поднел жалба до Апелациониот суд за неговиот клиент кој беше осуден на доживотна казна затвор за грабнување и две свирепи убиства. Адвокатот Страшевски бара Палевски да биде ослободен од вина или предметот пак да се суди на јавна седница, објави „Скопје 1“.

Адвокатот како што наведува порталот, се жали на процесни и суштествени повреди во постапката а доказите врз основа на кои Палевски беше осуден на доживотен затвор ги нарекува „расказ со значајни несогласувања“.

Судија-известител за предметот во скопска Апелација е Ѓоко Ристов, а предметот веќе е доставен на мислење до Вишо јавно обвинителство Скопје.

Во првостепената пресуда, судијата Ивица Стефановски на Палевски и на останатите обвинети – Велибор Манев, Боре Видевски и Влатко Кешишев – им изрече по 10 години затвор за кривичното дело грабнување на Вања Ѓорчевска и Панче Жежовски, како и доживотна казна затвор за двете свирепи убиства.

Таткото на Вања, Александар Ѓорчевски, беше ослободен за помагање, но Обвинителството ја обжали пресудата и за Ѓорчевски.