Жителите на бразилскиот град Манаус, кој беше тешко погоден од епидемијата на коронавирусот, можеби стекнале колективен имунитет по зголемениот број на инфекции, покажуваат прелиминарните резултати од нова студија.

Според резултатите објавени на сајтот „Медрксив“, 66 отсто од популацијата има антитела против коронавирусот, пренесува АП.

Епидемијата на коронавирусот во Манаус беше брза и брутална, но авторите на студијата, меѓу кои се и 34 бразилски и странски истражувачи, сметаат дека е достигната границата на колективниот имунитет и дека вирусот веќе не може лесно да се шири.

– Сите знаци укажуваат на фактот дека толкава изложеност на вирусот донесе до намален број на нови случаи и жртви во Манаус, изјавила координаторката на студијата, професорката по медицина Естер Сабино од Универзитетот во Сао Паоло.