Во Албанија не престануваат реакциите по вчерашните насилства во законодавниот дом, предизвикани од опозициските албански демократи.

Попладнево реагираа амбасадата на Соединетите Американски Држави и на Обединетото кралство, кои искажуваат загриженост и ги осудуваат актите на насилство.

„Ваквите штетни и потенцијално штетни дејствија немаат место во демократскиот процес. Ги повикуваме сите вклучени страни да покажат воздржаност, да се вклучат во конструктивен дијалог и да ги прифатат вредностите на почит и граѓанство, додаваат од Амбасадата на САД

Амбасадата соопштува дека поддржува мирни и кооперативни дискусии за преговорите за членство на Албанија во ЕУ.

„Ги поддржуваме мирните и кооперативни дискусии поврзани со преговорите за членство на Албанија во ЕУ и ќе продолжиме да стоиме покрај албанските институции додека тие работат на приближување на Албанија до евроатлантската заедница, се наведува во соопштението од американската амбасада.

Во реакцијата на Британската амбасада се нагласува дека насилството нема место во демократијата и се бара од сите албански политички партии да се вклучат во конструктивен дијалог и мирни парламентарни процеси.

-Ја осудуваме секоја активност која има за цел да ги поткопува овие принципи и остануваме посветени на поддршката на народот и демократијата во Албанија, се вели во соопштението на британската амбасада.

Амбасадорот на Европската унија во Тирана, Силвио Гонзато повика да се „намалат тензиите и да се избегнат нападите“.

– Без разлика каков став или идеја имаме, ова не е начин да се изрази мислењето. Ова е за жалење. Исто така, морам да кажам дека во една функционална демократија како Албанија, незадоволството од различни видови треба да се изрази на вистински начин и да не се употребува насилство или да се врши насилство или да се направи штета на имот за да се изрази мислењето, рече Гонзато.

Вчерашната попладневна седница на албанскиот парламент траеше само 15-тина минути, поради хаосот што го предизвикаа опозициските демократски пратеници, па претседателката Елиса Спиропали мораше да ја прекине.

Тензичната ситуација почна на самиот почеток кога Спиропали побара да му се одземе мандатот и од Централната изборна комисија да се побара замена за пратеникот Ервин Салињани, кој во моментот е на издржување затворска казна.

Веднаш потоа демократските пратеници ја блокираа собраниската говорница, фрлаа со разнк предмети кон Спиропали, упатуваа навреди, дури и кон обезбедувањето, во што предничеше Фљамур Нока, инаку и генерален секретар на партијата, кој сакаше физички да се пресмета со социјалистот Петро Кочи.

Демократите ги извадоа столчињата на кои седат во салата, пред собраниската зграда, ги полеаја со бензин и ги запалија.

In Albania 🇦🇱, the opposition MPs burn their chairs in protest against the imprisonment of their colleague Ervin Salianji who has been sentenced to one year in prison for making a false report against former Socialist Interior Minister Fatmir Xhafaj. pic.twitter.com/5c5YiqhgVh

— Jakub Bielamowicz (@KubaBielamowicz) October 1, 2024

– Сцената прикажана на денешната пленарна седница, со блокирана говорница и запалени столчиња, ќе биде таа што секојдневно ќе го придружува Собранието. Техничката влада е решението Албанија да оди напред и да спроведе слободни избори, изјави Нока по седницата.

Ваква тензична атмосфера во албанскиот законодавен дом не се новина. Претходно речиси цела година седниците беа прекинувани по само десеттина минути од почетокот и во хаос изгласувани документи само со гласовите на владејачкото мнозинство.