Оставки во Пентагон: Се повлече шефот за одбранбена политика Џејмс Андерсон, го менува генерал Тата
Вршителот на должноста шеф на оделот за одбранбена политика на Пентагон, Џејмс Андерсон синоќа поднесе оставка и веќе е заменет со контроверзниот пензиониран генерал Ентони Тата, познат по своите исламофобични коментари и по тоа што поранешниот претседател на САД, Барак Обама, го нарече „терористички лидер”, наведуваат американските медиуми.
Андерсон поднесе оставка само ден, откако актуелниот американски претседател Доналд Трамп го разреши министерот за одбрана Марк Еспер, соопштија двајца неименувани американски одбранбени претставници.
Не е јасно дали од Андерсон било побарано да поднесе оставка, пренесува „Си-Ен-Ен“, истакнувајќи дека тој беше вршител на должноста потсекретар за одбранбена политика откако Трамп во февруари годинава го отпушти Џон Род.
Американските медиуми наведуваат дека Тата во 2018 година објавил на Твитер дека исламот е „најрепресивната насилна религија” што ја познава и притоа поранешниот американски претседател Барак Обама го нарече „терористички лидер” и муслиман.
Американските медиуми, исто така, го опишуваат Тата како лојална личност на Трамп и како поранешен коментатор на „Фокс Њуз“.
Трамп завчера соопшти дека го смени министерот за одбрана, Марк Еспер и најави дека неговото место ќе го заземе директорот на Националниот центар за борба против тероризмот, Кристофер Милер.
Трамп на Твитер објави дека Милер ќе биде вршител на должноста министер за одбрана и дека одлуката ќе стапи на сила веднаш.