„Ослобоѓење“ од Босна и Херцеговина се огласи со поддршка до „Слободен печат“ и со итен апел за заштита на новинарите и слободата на медиумите во Северна Македонија.

– Се обраќаме во име на „Ослобоѓење“ од Босна и Херцеговина, во знак за поддршка за „Слободен печат“ и почитуваната новинарка Мирослава Симоновска. Со жалење дознавме дека госпоѓата Симоновска била тајно снимана во тек на состанок со изворот, а лажните обвиненија за нејзините постапки се дополнително емитувани.

Таквите акти на надзор и дезинформација ги загрозуваат основните принципи на слободното новинарство, поткопувајќи ја клучната улога на медиумите во одржување информирана јавност. Извесувањето на госпоѓа Симоновска имало за цел откривање на важни правосудни проблеми, а целното вознемирување на кое сега е изложена, укажува на поширок обид новинарите да се заплашат и да се замолчат. Ги повикуваме властите во Северна Македонија веднаш да преземат одлучни чекори за да го истражат и решат овој сериозен инцидент. Слободата на медиумите, сигурноста на новинарите и правото на независно известување се столбови на демократијата, а секој напад на нив претставува напад на демократските вредности.

Изразуваме целосна солидарност со нашите колеги во „Слободен печат“ и повикуваме на итно делување со цел заштита на госпоѓа Симоновска – стои во обраќањето од „Ослобоѓење“.