Што би се случило ако околу 200 припадници на глобалната елита секоја година се собираат на строго таен ретрит? Што би правеле? За што би разговарале? Кој би бил на списокот на гости?

Податоци што ги протече швајцарската хактивистка Маја Арсон Крајмју — која во 2023 година ја објави и листата на американското Министерство за правда за забрана за летање — фрлаат нова светлина врз „Дијалог“, приватниот социјален клуб што го основаа поранешниот шеф на „Пејпал“, Питер Тил, и инвеститорот Аурен Хофман, пишува „Гардијан“.

Мрежата постои од 2006 година и редовно собира политичари, претприемачи, странски функционери, академици, основачи од Силиконската долина, па дури и луѓе од Холивуд, кои доаѓаат на собирот само со покана. Во август, гостите, кои не мора нужно да бидат постојани членови на групата, треба да се соберат надвор од Даблин на овогодишниот дводневен настан.

Иако постоењето на „Дијалог“ не е нова информација, протечените податоци откриваат неколку необични работи.

Има систем за оценување на членовите

Според анализата на „Вајрд“ на протечените податоци, „Дијалог“ ги оценува учесниците на своите настани според скриена скала, рангирајќи ги според нивното богатство и славата. Секој добива оценка А, Б или Ц, при што оценката „Ц“ им се доделува на најпознатите и на највлијателните.

Актерот Џош Бролин се смета за ВИП-гостин, а во белешките за неговото членство се наведува:

„Неговата улога на Танос во серијалот ‘Одмаздници’ и учеството во филмови со голема заработка, како ‘Одмаздници: Крајна игра’, кој заработи повеќе од 2,79 милијарди долари, придонесуваат за неговата истакнатост“.

Но тоа не е единствениот начин на кој се оценуваат учесниците. Повеќето добиваат и оценка за „додадена вредност“ од 1 до 4, врз основа на проценки од персоналот на „Дијалог“.

Ако се утврди дека нечија „додадена вредност е премногу ниска“ или дека личноста е „лошо вклопена на културно ниво“, може да биде исклучена од настаните.

Оценките се користат и за одредување на цената за настаните на „Дијалог“, кои учесниците може да ги чинат десетици илјади долари.

Учесниците со пониска оценка плаќаат полна цена во околу 70 отсто од случаите, додека, пак, само околу една четвртина од ВИП-гостите мора да ја платат повисоката сума.

Сесиите се чудни

Планираните настани се движат од сесии како „Вратете ја нуклеарната енергија“ до теми посветени на „Дезинформации и дипфејкови“, „Контраинтуитивни ставови за вештачката интелигенција“, „Демократија под надзор“ и „Дали парите ја купуваат среќата?“.

Ако барате нешто понеформално и понормално на прв поглед, агендата вклучува и сесии за градење култови — модерирани од основачот на христијанската страница „Преј“ — една сесија за „Навигација низ Трета светска војна“ и сесија со наслов „Каков ви е сексуалниот живот?“.

Разоткриено е тајно друштво на техномилијардерот Питер Тил — протекоа имињата на елитата што зборувала за култови, војна и за љубовни врски

Дали станува збор и за љубовен клуб?

Кога веќе станува збор за сексуалниот живот, според „Вајрд“, „Дијалог“ има и систем за спојување членови за вмрежување и за љубовни состаноци.

Една белешка покажува дека персоналот споил двајца членови зашто „и двајцата се во Њујорк и работат во владата“. При претставувањето, секоја личност добива фотографија и кратка биографија за другата.

Но, „Дијалог“ води и список на комбинации што не треба да се спојуваат — на пример, учесници што се сопружници или веќе се професионални соработници.

Понекогаш, сепак, не е наведена причина зошто некои луѓе се означени така.

Како протекоа сите овие податоци?

Повеќе од бизарниот систем за рангирање, чудните сесии, па дури и системот за спојување, еден од најзбунувачките аспекти на сето ова е фактот што воопшто дознавме за него.

Со оглед на тоа што меѓу членовите на групата има некои од културно и политички најважните луѓе во светот, би се очекувало ваквите информации да бидат многу подобро заштитени.

Податоците откриени во протекувањето вклучуваат домашни адреси, телефонски броеви, електронски адреси, датуми на раѓање и други биографски податоци, како и информации за алергии на храна и политички ставови на некои членови.

— За мене е просто неверојатно како ова повторно покажува дека луѓето што управуваат со светот се толку сигурни во сопствената безбедност што воопшто не се трудат да имаат соодветна оперативна заштита. Дури ни за нивните „оф д рекорд“ тајни конвенции, каде што се вмрежуваат и разговараат за нашата заедничка иднина — изјави Крајмју, која ги протече податоците.

Илон Маск и Каја Калас се појавија на протечениот список за тајни собири на Питер Тил