Општина Центар урива дивоградба до училиштето „Коле Неделковски“
Општина Центар започна со отстранување на нелегално поставени објекти на јавна површина како што се диви доградби и тераси, со кои се узурпира јавниот простор.
Како што информираат од Центар, акцијата започнала денеска со уривање на бесправно изградена барака на улицата Антоние Грубишиќ.
Оттаму додаваат дека отстранувањето на оваа напуштена и нефункционална барака се спроведува за да се обезбеди безбеден пристап на учениците до основното училиште „Коле Неделковски“. Со уривањето ќе се прошири постоечкиот влез во ова училиште, со што излегува во пресрет на барањата на засегнатите жители, родителите и на самото училиште.
Повторно упатувам апел до сите инвеститори, сопственици на нелегални објекти и доградби, да постапуваат по издадените решенија и да го почитуваат Законот. Во спротивно, општината присилно ќе ги отстрани, со што трошоците за отстранувањето ќе паднат на товар на инвеститорите, односно сопствениците на нелегално поставените објекти – порачува градоначалникот Горан Герасимовски.
Општина Центар до крајот на годината ќе спроведе шест решенија за присилно административно извршување на нелегално поставени објекти и доградби.