Нападите на Русија во населените области на Украина предизвикуваат „огромна загриженост“ и може да претставуваат воени злосторства, изјави шефицата на ОН за човекови права.

Презентирајќи го својот последен извештај за ситуацијата во Украина, Мишел Башелет изрази загриженост поради „упорната употреба на експлозивно оружје со ефекти на широк простор во населените места“.

Таа рече дека проектилите, тешките артилериски гранати и ракетите и воздушните напади предизвикуваат „масовно уништување и оштетување на цивилни објекти“.

Башелет рече дека нејзината канцеларија добила „веродостојни наводи дека руските вооружени сили користеле касетна муниција во населените области најмалку 24 пати“.

Нејзината канцеларија, исто така, ги истражува наводите дека и украинските сили го користеле ова оружје, рече таа.

Канцеларијата за права на ОН, рече таа, верификувала 77 инциденти во кои биле оштетени медицинските установи, вклучително и 50 болници.

Десет од објектите се целосно уништени, рече таа, додавајќи дека реалните бројки „веројатно ќе бидат значително поголеми“.

„Недискриминирачките напади се забранети според меѓународното хуманитарно право и може да претставуваат воени злосторства“, предупреди Башелет.

ОН обично не наведуваат категорично дека се вршат воени злосторства, бидејќи тоа може да се утврди само на суд.

Но, Башелет рече дека „масовното уништување на цивилни објекти и големиот број на цивилни жртви силно укажуваат на тоа дека основните принципи на разлика, пропорционалност и претпазливост не се доволно почитувани“.