Поранешниот шеф на израелската одбрана, Гади Ајзенкот, сè повеќе се наметнува како главен противник на актуелниот премиер Бенјамин Нетанјаху, неколку месеци пред парламентарните избори во Израел, објави ЦС-монитор.

Неговата нова центристичка партија „Јашар“, што на хебрејски значи „право“, бележи брз раст во анкетите. Според истражувањата, таа во моментов е втора политичка сила, веднаш зад десничарскиот „Ликуд“ на Нетанјаху.

Израелците треба да изберат нов парламент најдоцна до 27 октомври, иако се очекува гласањето најверојатно да се одржи на 20 октомври. Анкетите покажуваат дека и блокот на Нетанјаху и опозицијата би можеле тешко да дојдат до мнозинство. Израелските коалиции обично се составени од повеќе партии.

Ајзенкот, кој има 66 години, беше шеф на одбраната од 2015 до 2019 година, по што влезе во политиката. Студирал политикологија во Хаифа и важи за познавач на либанскиот Хезболах.

Неговата лична трагедија силно одекна во израелската јавност. Неговиот син и двајца внуци беа убиени во војната во Газа. Дел од Израелците сочувствуваат со неговите загуби, особено кога тие се споредуваат со искуството на Нетанјаху. Синот на премиерот, Јаир, од почетокот на војната во октомври 2023 година живее во странство и не служел во борбена единица.

Ајзенкот остро ги критикуваше обидите на десничарската влада на Нетанјаху да ги ослободи ултраортодоксните мажи од воена обврска.

Политички, Ајзенкот се смета за умерен. Тој се спротивстави на раселувањето на населението од Појасот Газа, иако идејата за решение со две држави ја нарече „неважна“ по нападот на Хамас на седми октомври.

Медиумите објавуваат дека Ајзенкот во минатото се изјаснувал и против израелски воени напади врз иранските нуклеарни постројки, сметајќи дека таков потег би бил оправдан само ако Израел се соочи со непосредна егзистенцијална закана од Техеран.

Иран го обвини НАТО за соучество во „агресивната војна на Америка и на Израел“