ОН алармира: Албанските групи се главни играчи на пазарот на кокаин во Европа
Производството на кокаин достигна рекордно ниво. Се појавија нови центри за шверц, се истакнува во најновиот извештај на Обединетите нации за дрога и криминал.
Во извештајот на ОН, албанските криминални банди се сметаат за најважните играчи на светскиот пазар на кокаин.
Според извештајот, во последната деценија, криминалните банди што зборуваат албански станаа главни играчи на пазарот на кокаин во Европа, потпирајќи се на широката мрежа на соработници меѓу албанската дијаспора во странство и често како соработници на италијанските криминални групи.
Албанските криминални банди работат со дистрибуција на големи количини кокаин во многу делови на Европа, особено во Обединетото Кралство и Холандија, создавајќи директни односи со добавувачите во Латинска Америка, се наведува во извештајот на ОН.
„Албанските групи се многу активни во шверцот на кокаин низ Западна Европа, особено до пристаништата во Белгија и Холандија, каде пристигнува големо количество на кокаин, и тоа во Драч, главното пристаниште на Албанија,” се наведува во извештајот.
Помалку истражените пазари на кокаин во Источна Европа главно се снабдуваат од албанските и српските криминални банди. Конкретно, српските криминални групи веќе извесно време го снабдуваат Балканот со кокаин од Еквадор, се вели во извештајот.
