Оливија Њутн-Џон првпат дознала дека има рак на дојката во 1992 година, а болеста повторно ѝ се вратила во 2013 и 2017 година, а како и нејзината ќерка Клои Латанзи и глумицата е наклонета кон природната медицина.

Во интервјуто за „Хералд сан“, кое го дала заедно со нејзината ќерка Клои Латанзи во неделата, глумицата Оливија Њутн-Џон рекла дека не планира да се вакцинира против коронавирусот. Пред две години беше откриено дека Оливија Њутн-Џон, ѕвезда на филмот „Брилијантин“, користела марихуана во медицински цели, откако по третпат ѝ беше дијагностициран рак на дојка, во четврти стадиум, во 2017 година.

Марта Стјуарт, Џоан Колинс и Сер Дејвид Атенбороу се наоѓаат меѓу растечката листа на славни личности од А-листата што ја примиле вакцината против ковид-19.

Но, за поборничката на „природната“ медицина Оливија Њутн-Џон (72), вакцинирањето не е на нејзиниот животен список.

Во интервјуто за „Хералд сан“, кое го дала со нејзината ќерка Клои Латанзи (34) во неделата, поп-иконата рекла дека не планира да се вакцинира против смртоносниот вирус.

– Не, во овој момент, не – вака одговорила актерката на прашањето дали наскоро ќе се вакцинира, пренесува Индепендент.

Иако Њутн-Џон не објаснила зошто не сака да се вакцинира, нејзината ќерка Клои Латанзи ги споделила своите необични ставови за вакцинацијата, наведувајќи дека е против „ставање жива и пестициди во (нејзиното) тело“, а кои, според неа, се наоѓаат во многу вакцини.

Латанзи, која верува дека „вистинскиот лек е она што доаѓа од земјата“, води фарма со канабис во Орегон со нејзиниот партнер Џејмс Дрискил и нема никакви научни или медицински квалификации, подвлекува „Индепендент“.

И покрај тврдењето дека „не е антиваксер“, ќерката на Њутн-Џон додала дека луѓето „им веруваат на вакцините затоа што лекарите велат дека се безбедни“.

Латанзи тврди дека таа „направила истражување“ и засега верува дека вакцините не се безбедни.

– Ако имав можност да земам билки и растенија како бебе, наместо да ми вбризгуваат токсини, ќе го направев тоа – инсистирала таа.

Вакцинациите се од витално значење за намалување на ширењето болести што можат да се спречат, а секоја ваква сугестија е штетна за науката и за советите на медицинските експерти низ светот.

Тоа доаѓа откако Клои Латанзи ги сподели своите ставови во врска со вакцините и пандемијата на ковид-19 во објава на Инстаграм минатиот месец.

Во сега избришаната објава, Клои се претстави како антиваксер и тврдеше дека маските за лице можат да предизвикаат „здравствени проблеми“. Таа дури тврдеше дека луѓето „плачеле пред неа бидејќи не можеле да дишат и дека сега имаат здравствени проблеми, по носењето маски“.