Багери на јавно претпријатие на Општина Охрид деновиве направиле пустош чистејќи го коритото на Коселска Река, соборувајќи десетици дрвја стари повеќе децении, алармира денеска еколошкото движење Охрид СОС.

„Наши сограѓани деновиве реагираа дека при чистењето и проширувањето на речното корито при неодамнешните обилни врнежи, на потегот од Извиднички Центар по цела должина на Коселска Река сè до мостот што се наоѓа на стариот пат за Струга, општинските претпријатија имаат направено чистка на десетици врби, багреми, тополи стари повеќе децении“, велат од Охрид СОС.

Оттаму велат дека секое чистење на коритото на реката досега, се внимавало на дрвјата, но не и овој пат.

„Според она што е воочено, сè е срамнето, не e оставено ниту едно стебло. Како што велат ова е прв пат вакво нешто да сторат јавните претпријатија, секогаш кога се чистело коритото на реката се внимавало на дрвјата, но сега е уништен еден цел мал еко-систем кој бил дом на различни видови“, велат од Охрид СОС.