Ракометарите на РК Охрид одиграа меч за паметење и со убедливи 30-21 ја совладаа чешката Дукла Прага во првиот осминафинален дуел од Европски Куп на ЕХФ.

Македонскиот суперлигаш фуриозно го отвори натпреварот, правејќи серија од 6-0 со која рано стави до знаење кој ќе го диктира темпото на теренот. Предноста сигурно ја одржуваше до паузата, на која замина со комотни 16-9.

Во второто полувреме, гостите од Прага не најдоа решение за разиграниот состав на Охрид. Домашните продолжија со цврста одбрана и ефикасен напад, во еден момент стигнувајќи и до убедливи „плус 13“ (30-17). До крајот, чешкиот тим само го ублажи поразот, но конечниот резултат 30-21 јасно ја отслика доминацијата на охриѓани.

Најефикасен во редовите на Охрид беше Дарко Ѓукиќ со осум погодоци, додека Анте Иванковиќ додаде седум. Кај Дукла, по четири реализации запишаа Мелик, Дуда и Војтела.

Реванш средбата меѓу Охрид и Дукла Прага е закажана за 21 февруари, кога ќе се решава патникот во следната фаза.