Официјално: Брозовиќ потпиша нов договор со Интер
Хрватскиот фудбалер Марсело Брозовиќ потпиша нов договор со Интер, денеска потврди миланскиот клуб. Искусниот играч за врска ќе го носи дресот на Интер до 30 јуни 2026 година.
Според италијанските медиуми тој ќе заработува 6,5 милиони евра по сезона, со бонуси. Со оглед на тоа што претходниот договор му истекуваше ова лето, се шпекулираше дека може да го промени клубот.
– Среќен сум што потпишав нов договор, бидејќи навистина сакав да останам и клубот го знаеше тоа.
Не сакав ни да разговарам со други клубови, од почит кон Интер и неговите навивачи. Им реков на моите агенти да не преговараат со никого додека Интер не каже дека нема да добијам нов договор – рече Брозовиќ.
Хрватот со миланските „нераѕури“ успеа по еднаш да ги освои Серија А и Суперкупот на Италија, а беше финалист во Лига Европа во сезоната 2019/2020.