Одамна изгубената слика на барокниот сликар Петер Паул Рубенс, која била скриена повеќе од четири векови, денес беше продадена за 2,3 милиони евра на аукција во Версај. Сликата неодамна беше пронајдена во приватна куќа во Париз, а го прикажува распетието на Исус Христос, пренесува „АП“.

Била дел од една француска колекција и првично се сметало дека потекнува од една од многуте Рубенсови работилници што тогаш постоеле.

Делото долго време било проценувано на не повеќе од 10.000 евра.

„Веднаш имав чувство за оваа слика и направив сè што можев за да утврдам дали е автентична“, изјави аукционерот Жан-Пјер Осена за „АП“.

Нилс Битнер, експерт познат по своите истражувања за Рубенс, објасни пред аукцијата дека Рубенс често сликал сцени на распетие, но ретко го прикажувал „распнатиот Христос како безживотно тело на крстот“.

„Ова е единствената слика што прикажува како крв и вода истекуваат од раната на Христос, и тоа е нешто што Рубенс го насликал само еднаш“, наведе тој.

Аукциската куќа соопшти дека автентичноста и потеклото на делото биле потврдени по научна анализа.

Беше речено дека микроскопското испитување на слоевите боја открило не само бели, црни и црвени пигменти во деловите што ја претставуваат кожата, туку и сини и зелени пигменти, чие користење е вообичаено за Рубенсовите прикази на човечка кожа.

Експертот за уметност Ерик Туркин изјави пред полна сала дека сликата практично исчезнала на почетокот на 1600 година.

Познато е дека ѝ припаѓала на францускиот класичен сликар од 19. век, Вилијам Бугро, пред да ја наследат неговите потомци.