Државата, која досега редовно ги исплаќаше обврските кон американско-турскиот конзорциум „Бехтел и Енка“ за автопатите од Коридор 8 и Коридор 10Д, сега ќе ги финансира со кредит од четири македонски банки- пишува Фактор. Одлуката била донесена на седница на Владата на 2 јуни.

Кредитот ќе изнесува 140 милиони евра, со рок на користење 30 месеци, грејс период од три години и отплата во следните 12 години. Министерката за финансии Гордана Димитриеска Кочоска е овластена да ја потпише државната гаранција, која го покрива главниот долг, каматата и провизијата во случај Јавното претпријатие за државни патишта не ги исполни обврските кон банките.

„Со оваа одлука, Владата издава државна гаранција со која го гарантира навремено и целосно исполнување на обврските на Јавното претпријатие за државни патишта кон четирите банки по основ на провизија за одобрен, а неискористен износ на кредит, главен долг и камата“, стои во објавата во Службен весник.

На истата седница беше одобрена и државна гаранција за заеднички кредит од 176,5 милиони евра за доизградба на автопатот Кичево – Охрид, кој досега се финансираше од кинеската Ексим-банка. Условите за кредитот се идентични како за „Бехтел и Енка“.

Продолжен е рокот за делниците Тетово-Гостивар и Гостивар-Букојчани

Претходно, владата најави дека кинеското финансирање за Кичево – Охрид престанува, но за автопатите на „Бехтел и Енка“ не беше најавено земање кредит, што предизвика изненадување со грејс периодот од три години и висината на финансирањето.