Неодамна од печат излезе најновиот, седми роман на Владо Јаневски, „Изгубени низ дупки во џебовите“, во издание на „Бата прес“, Скопје. Романот е за Југославија што не престанала да постои и беше селектиран во најтесен избор за наградата „Пегаз“.

Писателката Сузана Камберова за „Изгубени низ дупки во џебовите“ во својот осврт напиша: „Ова е четиво за љубителите на Борхес, Булгаков и Кафка, но и за сите што сакаат да почувствуваат како фикцијата може да биде и предупредување и утеха.“

Владо Јаневски е писател, поет, сликар и стрип-автор. Роден е во Прострање, Македонија. Во Битола завршил основно и средно образование. Високо образование стекнал во Скопје. Член е на Друштвото на писателите на Македонија. Честопати патува по светот – престојувал во осумдесетина земји.

Автор е на романите за возрасни: „Кој го уби Едгар Алан По“ („Или-Или“, Скопје, 2024), „Смртта не е крај“ („Арс Ламина“, Скопје, 2022), „Мртвите знаат најдобро“ („Арс Ламина“, Скопје, 2020), „Чудо зад аголот“ („Пагома прес“, Скопје, 2020), „Под друга капа“ („Магор“, Скопје, 2019), „Made in Jabana“ („Слово“, Скопје, 2004); збирка наградувани раскази „Нема враќање“ („Студентски збор“, Скопје, 1985) и поетски збирки: „На грбот на неповратот“ (Агенција за иселеништво, Скопје, 2024) и „Молкозбор“ (награден поетски ракопис, „Анте Поповски – Антево перо“, Скопје, 2025).

Владо Јаневски е добитник на повеќе книжевни награди: златен „Пегаз“ за најдобар необјавен роман во 2020 г. и сребрен „Пегаз“ за роман во најтесен избор во 2025 г.; наградата „Стојан Христов“ за најдобра поетска збирка (2024); наградата „Антев златник“, за поетскиот ракопис со висок квалитет (2025); наградата „Скрипт Фест“ за најдобро сценарио за долгометражен филм (2021); наградите „Современи бајки од Македонија“ за две најдобри бајки (2021). Награди за краток расказ: многупати бил наградуван со први награди на конкурсите за раскази на весникот „Студентски збор“ и „Електролит“ („Темплум“, Скопје).

Повеќепати бил наградуван и на конкурсите за краток расказ на весникот „Нова Македонија“. Добитник е и на наградата „Македонски корени“ за постигнувања во литературното и ликовното творештво (2024). Финалист за наградата „Стале Попов“ на Друштвото на писателите на Македонија (2024), во најтесен избор за наградата „Роман на годината“ (2024) и финалист за поетската награда „Караманов“ (2025). Се занимава и со сликарство, учествувал на ликовни колонии во Македонија. Неговите слики се дел од приватни колекции во повеќе земји.

(Текстот е објавен во „Културен печат“ број 332, во печатеното издание на весникот „Слободен печат“ на 16-17.5.2026)