Новак Ѓоковиќ се пласираше директно во четвртфиналето на Отвореното првенство на Австралија, откако неговиот противник во осминафиналето, Јакуб Меншик (Чешка), го предаде мечот без борба.

Меншик одлучи да се повлече од турнирот поради повреда, што го објави преку својот Инстаграм профил:

– Тешко е да се напише ова. Откако направивме сè што можевме за да продолжиме понатаму, морам да се повлечам од Австралија Опен поради повреда на стомачниот мускул која се влошуваше во последните неколку мечеви. По долги разговори со мојот тим и лекарите, донесовме одлука да не играм. Иако сум разочаран, стигнувањето до четвртото коло тука за прв пат е нешто што ќе го носам со себе долго време. Ја почувствував огромната енергија на публиката, а атмосферата во Мелбурн беше навистина посебна. Ви благодарам на мојот тим што беше со мене на секој чекор од патот и на сите што испраќаа пораки и ме бодреа – тоа значи повеќе отколку што можете да замислите. Сега е време да се опоравам правилно – стои во објавата на Меншик.

Меншик претставуваше сериозен предизвик за Ѓоковиќ, откако го победи на Мастерс турнирот во Мајами минатата година.

Српскиот тенисер ќе има пауза од дури четири дена и го чека победникот од мечот помеѓу деветтиот и петтиот носител, Лоренцо Музети (Италија) и Тејлор Фриц (САД).