Нова продукција на платформата за млади уметници „Инкубатор“ е танц-проектот „Прозорци“
Во продукција на „Инкубатор“ – платформа за млади уметници, на 15 декември, со почеток во 19 часот, во Домот на АРМ премиерно ќе биде изведен проектот „Прозорци“.
Автор на проектот е Матеа Мијановиќ, а го создава во соработка со младите уметници Митко Дамјановски, Анастасија Данчевска, Дејан Битровски, Адријана Данчевска и Драган Теодосиев. Проектот е поддржан од Министерството за култура и од Град Скопје.
Идејата врз која се базира продукцијата е истражување на нови правци на создавање, тематски поврзани со лични состојби, како отвореност и спреченост, состојби кои се во директен сооднос со самите уметници, нивните внатрешни и надворешни ограничувања и можности.
Проектот „Прозорци“ е резултат на креативните работилници кои се одвиваа на овие теми, експресивен графички и геометриски приказ, во кои се детерминираат можностите и се надминуваат границите, преку минималистички пристап во сите три уметнички категории.
„Прозорци“ е студија за релациите, отуѓеноста и моменталното чувство на поединецот, искажана низ монотонијата на секојдневните рутини во однесувањето, со цел да отвори „прозорец“ кон надминување на тие секојдневни рутини и калапи на однесување.
Матеa Мијановиќ е скулптор и продуцент. Со свои дела учествува во повеќе изложби, меѓу кои и на групните изложби: „Близина и Далечина“ во Младинскиот културен центар и групна изложба на Факултетот за ликовни уметности – Скопје во 2016 година; „Young Art“ во Националната галерија на Македонија – Мултимедијален центар „Мала станица“ во 2015 година; групна изложба на Факултет за ликовни уметности – Скопје во 2014 година.
Во периодот од 2014 до 2020 година работи како асистент на проектите на академскиот скулптор Жарко Башески. Во 2018 година го создава и менаџира проектот „Инкубатор – Платформа за млади уметници“, првично поддржан од Швајцарската амбасада во Скопје. Овој проект се одвива во континуитет и во 2019, 2020, 2021 и 2022 година.
Во 2018 и 2019 година го создава и менаџира проектот „Современ Стар Град“, кој е поддржан од Град Скопје и Министерството за култура. Во 2020 го создава проектот „Протоген – Прва колонија за применета уметност“, кој во континуитет се одржува и во 2021 година.
Во 2021 работи како координатор на реставрација на „Куќата на Соколови“, проект во рамките на ПЛРК-програмата водена од Светска Банка, со кој комплетно се реставрира и санира традиционална куќа, изградена во 1812 год, која како дел на кратовското градско јадро е заштитена како споменик на културното наследство на Македонија.
Матеа Мијановиќ работи и како сценограф и продуцент во повеќе танцови продукции и нивни меѓународни претставувања.