Бурата „Алекс“ што протатне низ Франција нанесе огромна материјална штета и одзеде два човечки живота, но властите стравуваат дека човечкиот биланс од несекојдневната елементарна непогода ќе биде далеку поголем со оглед дека 18 лица се водат како исчезнати од попладнево, како и двајца припадници на спасувачките екипи.

Преполните реки се излеаја од своите корита, а водата носеше се пред себе, пред сè, во областите Алп Маритим и Вар во околината на Ница.

Невремето од огромни размери ноќеска однесе и преку сто куќи додека дел објекти се нишаа над провалија.

– Ваква катастрофа досега сме немале, изјави градоначалникот на Ница, Кристијан Естрози.

Железничкиот сообраќај во тој дел на Франција е во прекин, бројни патни правци се отсечени, а неколку мостови се урнати.