Стриминг гигантот Нетфликс ја ангажираше инвестициската банка Moeлис & Кo да ја испита можноста за понуда за преземање на Варнер Брос Дискавери, дознава Ројтерс од три извори запознаени со плановите на компанијата. Според изворите, Нетфликс веќе добил пристап до таканаречената соба за податоци, базата на податоци со финансиски податоци потребни за подготовка на понудата, што укажува на сериозна фаза на разгледување на аквизицијата. Moeлис & Кo претходно ја советуваше Скајденс Медиа за време на нејзината успешна понуда за Парамаунт Глобал.

Ни Нетфликс, ниту Варнер Брос Дискавери не сакаа да коментираат. Преземањето би му дало на Нетфликс сопственост врз една од најзначајните холивудски продукции, вклучувајќи ги франшизите Хари Потер и ДС Комикс. Телевизиското студио Варнер Брос веќе продуцира голем број хит серии на Нетфликс како што се „You“, „Maid“ и „Running Point“. Покрај тоа, интеграцијата на ХБО и неговата стриминг услуга би можела значително да ја зајакне понудата на Нетфликс за престижни драми и да привлече нови претплатници.

Извршниот директор на Нетфликс, Тед Сарандос, минатата недела изјави дека компанијата е „повеќе градител отколку купувач“, но дека повремено разгледува аквизиции што би можеле да ја зајакнат нејзината пазарна позиција. Во исто време, претседателот на Комкаст Мајк Кавана, изјави дека неговата компанија активно ги оценува и медиумските аквизиции што би „ги надополниле постојните операции“ и ги отфрли тврдењата дека регулаторните пречки би биле непремостливи, пренесува Кликс.ба.