Среда и сабота во периодот од 08:30 до 12:00 часот, градскиот базен ќе биде резервиран само за жени и девојки, пишува „Сакам да кажам“.

Во овие термини, на мажи нема да им биде дозволено да се капат.

Во врска со ваквата контроверзна одлука за полова сегрегација, која е карактеристична за некои конзервативни муслимански земји, Назми Даути, раководител на секторот за Јавни дејности на Општина Тетово, вели дека истата била донесена по барање на граѓаните.

„Тие термини се предвидени базенот да го користат само жени и девојки бидејќи не сакале да има мешање со мажи на базенот. Тоа е направено според барање на граѓаните, односно граѓанките од Тетово“, изјави Даути.

За одлуката нема реакција од Советот Тетово, каде владејачко е мнозинството на коалицијата Вреди и ВМРО-ДПМНЕ.

Градскиот базен, кој е од покриен тип, почна да се гради во 2020 година со средства добиени од тогашното Министерство за спорт и млади, како дел од проектот за изградба на 14 базени во исто толку градови во државата и ова беше првиот базен кој беше изграден во рамките на овој проект.