Натпреварот од регуларната сезона на НБА лигата помеѓу кошаркарите на Чикаго булс и Мајами хит не се одигра во четврток навечер поради кондензација во „Јунајтед центар“, што го направи теренот небезбеден за игра.

Почетокот на натпреварот беше одложуван неколку пати, а публиката чекаше речиси два часа пред официјално да биде објавено дека натпреварот ќе биде одложен.

Од Чикаго соопштија дека билетите ќе важат за презакажаниот натпревар.

Во официјалното соопштение не е наведено што ја предизвикало влагата на подот, а медиумите објавија дека проблемот е поврзан со фактот дека салата ја делат тим од НБА и НХЛ, бидејќи Чикаго блекхокс претходно играле натпревар од хокеарската лига.

Тренерот на Мајами, Ерик Споелстра, рече дека играчите од двата тима се пожалиле на условите за игра.

– Се обидовме да го започнеме натпреварот, но играчите од двата табора се пожалија. Излеговме на теренот и речиси веднаш сфативме дека услови за игра не постојат – рече Споелстра.

НБА лига, резултати:

Шарлот – Индијана 112:114
Минесота – Кливленд 131:122
Јута – Далас 116:114