Кошаркарот на Филаделфија, Пол Џорџ, доби суспензија од 25 натпревари поради прекршување на правилата од Антидопинг програмата на НБА, соопшти денес лигата.

Поради оваа казна, деветкратниот ол-стар учесник ќе остане без околу 11,7 милиони долари од својата годишна заработка која изнесува 51,7 милиони долари. Тоа значи дека Џорџ ќе загуби приближно 469.700 долари за секој од 25-те натпревари кои ќе мора да ги пропушти.

Се очекува искусниот кошаркар повторно да му се стави на располагање на тимот на 25 март, кога Филаделфија ќе го пречека Чикаго.

Филаделфија моментално има скор од 26 победи и 21 пораз и се наоѓа на шестата позиција во Источната конференција. Со Џорџ во составот, тимот има биланс 16-11, додека без него на теренот скорот е израмнет  10-10.

Во актуелната сезона, Џорџ просечно постигнува по 16 поени на 27 одиграни натпревари, што го сместува на третото место меѓу стрелците на Филаделфија, зад Тајрис Мекси (29,4 поени) и Џоел Ембид (25,7).