Нов случај на брутално семејно насилство е забележан во скопското село Петровец, каде 67-годишен насилник пред своите ќерки и малолетната внука ја претепал сопругата и ја гушел, по што се обидел да ѝ ги врзе нозете со каиш, откри Обвинителството.

„Според обвинението, на 28 октомври, во семејниот дом по кратка вербална расправија, мажот со умисла физички ја нападнал својата сопруга, удирајќи ја со раце и нозе по телото и главата, по што ја гушел и се обидел со каиш да ѝ ги врзе нозете. Жената на моменти губела свест, но успеала да се ослободи и преку прозорецот да побегне кај соседите за да побара помош. Од нападот таа се здобила со тешки телесни повреди, меѓу кои скршеници на три ребра и бројни хематоми“, велат од ОЈО.

Обвинителството оценува дека постои опасност од бегство на осомничениот, но и висока веројатност да го повтори насилството, особено затоа што дел од нападот го извршил во присуство на своите ќерки и малолетната внука. ОЈО бара притвор за насилникот.