Над 40% од жените во Македонија трпат насилство
„Според последните податоци кај нас, 45% од жените изјавиле дека доживеале насилство во некоја форма; најчесто физички, ментално, емоционално, честопати премолчено и поттиснато, со чувство на беспомошност“, рече сопругата на претседателот, г-а Елизабета Ѓоргиевска.
Ова го покажува истражувањето на Министерството за труд и социјална политика во соработка со Британската амбасада и Фондот за население на обединетите нации, кое беше презентирано на денешниот настан „Има помош за живот без насилство“.
Пред две години е донесен Законот за спречување и заштита од насилство врз жените и семејното насилство кој е целосно усогласен со одредбите од Истанбулската конвенција. Целта на законот е да биде проширен системот на превенција и заштита на сите облици на родово базирано и семејно насилство.
За жртвите на семејно насилство постојано е достапна Националната бесплатна мобилна СОС линија 141 700. Случаите можат да ги пријават во најблиската полициска станица или до надлежниот Центар за социјална работа.